Emeli aň industriýasynyň çalt depginler bilen ösmegi, maglumat merkezlerini gurmak we olara hyzmat etmek üçin zerur bolan işçi hünärmenleriniň ýiti ýetmezçiligini ýüze çykardy diýip, WIRED neşiri ýazýar. Netijede elektriklere, gurluşykçylara, howalandyryş we sowadyş ulgamlaryny gurnaýan işgärlerine bolan isleg birden ýokarlandy.
Häzirki zaman maglumat işläp taýýarlaýyş merkezleri çylşyrymly elektrik üpjünçiligi, sowadyş we suw taýýarlaýyş ulgamlaryny talap edýär, olaryň gurluşygy bolsa ýokary başarnykly hünärmenlersiz mümkin däl. Kadr ýetmezçiligi köp adamyň EA ýa-da hyzmat ediş ugruny saýlamagy, işçi hünärlerini öwrenmegiň bolsa wagt hem-de tejribe talap etmegi bilen has-da güýçlenýär.
Elektrik gurnamalaryndaky ýa-da sowadyş ulgamlaryndaky ýalňyşlyklaryň hasaplaryň togtamagyna, enjamlaryň zaýalanmagyna we uly maliýe ýitgilerine getirip biljekdigi sebäpli, emeli aň üçin niýetlenen maglumat merkezleri ygtybarlylyk babatda has ünsli bolmagy talap edýär. Şunlukda kompaniýalar wajyp infrastrukturalarda iş tejribesi ýetik, ýöriteleşdirilen hünärmenler ugrunda biri-birleri bilen bäsleşmäge mejbur bolýarlar.
Şeýdip, täze maglumat merkezleriniň gurluşyk möhletleri uzalýar, şoňa görä bahalary-da ýokarlanýar. Hatda çip ýetmezçiligi ýa-da maýa goýumlaryň ýoklugy üçin däl-de, eýsem işleri öz wagtynda ýerine ýetirip biljek potratçylaryň ýetmezçiligi sebäpli yza süýşürilýän taslamalar-da az däl.
