2029-njy ýylyň gyşky Aziýa oýunlary Gazagystanda geçiriler

2029-njy ýylyň gyşky Aziýa oýunlary Almaty şäherinde geçiriler. Degişli resminama Milanda Gazagystanyň Milli Olimpiýa komitetiniň (MOK) prezidenti Gennadiý Golowkin we Aziýanyň Olimpiýa geňeşiniň başlygy Joan bin Hamad Al-Tani tarapyndan gol çekildi. Bu barada respublikanyň MOK-ynyň saýtynda habar berilýär.
«2029-njy ýylyň Aziýa oýunlarynyň Almatyda geçirilmegi gyşky Olimpiýa sport görnüşlerini ösdürmek üçin goşmaça itergi bolar. Bu biziň üçin uly synag — toplanan tejribämize hem-de eýýäm bar bolan we goşmaça gurluşygy talap etmeýän sport we şäher infrastrukturasyna daýanyp, ýurdumyzyň guramaçylyk ukybyny iş ýüzünde tassyklamak mümkinçiligidir» – diýlip, habarda Golowkiniň sözleri getirilýär. Ol Gazagystan üçin gyşky Aziadany gaýtadan kabul etmegiň «uly mertebedigini» nygtady.
Mundan ozal 2029-njy ýylyň Aziýa oýunlaryny geçirmek hukugy Saud Arabystanyna berlipdi, ýöne kabul ediji tarap infrastruktura taslamalarynyň geriminiň giňligi we ýaryşlara taýýarlyk görmegiň goşmaça talaplary sebäpli, oýunlaryň möhletini üýtgetmegiň zerurdygyny mälim etdi.
Gazagystan 2011-nji ýylda hem gyşky Aziýa oýunlaryny kabul edipdi, 2017-nji ýylda bolsa Almatyda Bütindünýä gyşky Uniwersiada geçirildi.