Toyota kompaniýasy «Highlander» modeliniň ornuny tutjak täze, üç hatar oturgyçly krossoweriniň içki keşbiniň ilkinji suratyny (tizerini) paýlaşdy. Ulagyň resmi danyşdyrylyşy 10-njy fewralda bolar, ýöne eýýämden görünýän zat — kompaniýa giňişlige we ýokary tehnologiýalara esasy ünsüni gönükdiripdir.
Paýlaşylan suratda döwrebap interýeriň esasy elementlerini görmek bolýar: dolulygyna sanly ekrandan ybarat sürüji paneli; salonyň merkezinde ýerleşýän iri göwrümli multimedia ulgamy; ikinji hatarda biri-birinden aýry ýerleşýän amatly oturgyçlar; salony has giň we ýagty görkezýän uly panoramaly üçek.
Deslapky maglumatlara görä, bu täze model 2021-nji ýyldaky bZ konseptine esaslanýan bZ25x elektrikli krossoweri bolup biler. Ulagyň önümçiliginiň 2026-njy ýylyň ikinji ýarymynda ABŞ-da başlamagyna garaşylýar.
Toyota-nyň bu täzeliginiň arkasynda anyk bazar seljermesi ýatyr. Çünki Highlander-iň satuwy 2025-nji ýylda ABŞ-da 37% azaldy. Has uly göwrümli «Grand Highlander» modeline bolan isleg 91% ýokarlandy. Bu görkezijiler alyjylaryň has giň we üç hatar oturgyçly krossowerlere artykmaçlyk berýändigini subut edýär.
Ýanwar aýynyň ahyrynda Toyota USA-nyň paýlaşan «Gözýetimde täze bir zat» diýen jümlesi köplerde pikap barada çaklama döredipdi, emma indi täze krossoweriň gelýändigi resmi taýdan tassyklanyldy.
