Kriştianu Ronaldu ýene-de «Al-Nasryň» ygtyýaryna geldi. Garaşylmadyk arakesmeden we uly zenzele turzan myş-myşlardan soň, portugaliýaly oýunçy topary bilen türgenleşiklerine dolanyp geldi diýip, abraýly insaýder Fabrisio Romano habar berdi.
Ronaldunyň Saud Arabystanynyň çempionatynyň oýnuny sypdyrmagy, Karim Benzemanyň «Al-Ittihad-dan» «Al-Hilala» geçmegi bilen bir hatarda soňky günleriň esasy wakalarynyň biri boldy. Möwsümde ilkinji gezek «Al-Nasr» meýdança öz lideri bilen çykmady, ýöne şonda-da «Er-Riýaddan» 1:0 hasabynda üstün çykdy. Emma Internetde ýaýran habarlaryň çäklerinde portugaliýaly futbolçynyň sanawa girmezligi ýagdaýy has-da ýitileşdirdi.
Köpçülikleýin habar beriş serişdeleriniň maglumatyna görä, Ronaldu klub ýolbaşçylarynyň transfer syýasatyndan närazy boldy. Saud Arabystanynyň Döwlet maýa goýum gaznasynyň «Al-Ittihad», «Al-Hilal» we «Al-Ahli» klublaryny işjeň güýçlendirýän wagtynda, «Al-Nasryň» gyşda güýçli täze oýunçylarsyz galmagy ony alada goýupdyr diýlip çaklanylýar. Bu ýagdaý meýdança çykmakdan ýüz öwürmek baradaky gürrüňleri, şeýle hem hüjümçiniň bu hili dolandyryş modelinde adalatly bäsdeşlik üçin howp görýändigi baradaky gürrüňleri döretdi.
Ronaldu möwsümiň möhüm döwründe — AFK-2 Çempionlar ligasynyň 1/8 finalynda Türkmenistanyň çempiony «Arkadag» bilen boljak iki oýunlyk gapma-garşylygyň öňüsyrasynda türgenleşiklere dolanýar. Geljek hepde «Al-Nasr» Aşgabada geler. Toparlaryň arasyndaky birinji oýun 11-nji fewralda Aşgabadyň Olimpiýa stadionynda geçiriler. 18-nji fewralda toparlar eýýäm Er-Riýad şäherinde duşuşarlar.
