Hokkeý boýunça Türkmenistanyň milli ýygyndysyny dünýä çempionatyna Ahmet Gurbanow taýýarlar

Hokkeý boýunça Türkmenistanyň milli ýygyndysynyň baş tälimçisi wezipesine Ahmet Gurbanow bellenildi. Onuň ýolbaşçylygynda topar 13-19-njy aprel aralygynda Keýptaun şäherinde (GAR) geçiriljek dünýä çempionatynyň III diwizionyna taýýarlyk görer.
Gurbanow täze wezipede Ylýas Weliýewiň ornuny eýelär.
Ikinji diwiziona çykmak ugrundaky ýaryşda Türkmenistanyň, GAR-yň, Türkiýäniň, Meksikanyň, Bosniýa we Gersegowinanyň, şeýle hem Tailandyň ýygyndy toparlary bäsleşer.
«Baş tälimçi wezipesine bellenmek uly jogapkärçilik. Men bu topary içgin tanaýaryn we diwizionymyzda ownuk-uşak zatlaryň: düzgün-nyzamyň, wezipeleriň anyk paýlanylmagynyň we psihologik durnuklylygyň uly ähmiýete eýedigine düşünýärin. Biz dünýä çempionatyna taýýarlyk döwründe hut şu ugurlaryň üstünde işläris» – diýip, Gurbanow belledi.
Ýygyndy toparyň taýýarlygy Türkmenistanyň IIM-niň «Galkan» gyşky sport oýunlary merkeziniň buzly meýdançasynda geçirilýär. Tälimçiniň sözlerine görä, giňeldilen düzüme ýaş oýunçylar bilen bir hatarda tejribeli liderler hem girdi.
«Maksadymyz, iň bolmanda, baýrakly üçlüge girmek. Esasy maksadymyz bolsa — diwizionda ýeňiji bolup, ikinji diwiziona çykmak» – diýip, ol nygtady.
Türkmenistanyň Hokkeý federasiýasy daşary ýurt toparlary bilen ýoldaşlyk duşuşyklaryny geçirmegiň mümkinçiliklerine hem seredýär.
Ahmet Gurbanow 32 ýaşynda. Ol mundan ozal milli ýygyndyda oýunçy we kapitan hökmünde çykyş edip, oýun tejribesini tälimçilik işi bilen utgaşdyrdy. Ol Kazan federal uniwersitetini «Bedenterbiýe we saglygy dikeldiş lukmançylygy» hünäri boýunça tamamlady, şeýle hem Daşkentde Şwesiýanyň, Finlýandiýanyň we beýleki ýurtlaryň hünärmenleriniň gatnaşmagynda geçirilen IIHF-niň (Halkara hokkeý federasiýasy) tälimçilik okuwlaryny geçdi.