Finlýandiýanyň milli ýygyndysy hokkeý boýunça dünýä çempionatynyň final duşuşygynda Şweýsariýanyň toparyny utdy. Ýaryş Sýurih şäherinde geçirildi. Ýeňijileriň düzüminde ýeke-täk goluň awtory goşmaça wagtda Konsta Helenius boldy.
Ýaryşyň netijesi boýunça, Şweýsariýanyň ýygyndysynyň goragçysy Roman Ýozi iň gymmatly oýunçy (MVP) diýlip yglan edildi. 36 ýaşly hokkeýçi ýaryşyň dowamynda 10 oýun geçirip, öz hasabyna 12 utuk (5 girizilen şaýba + 7 netijeli geçirim) ýazdy. Çempionatyň iň gowy bombardiri bolsa Şweýsariýanyň ýene bir oýunçysy Swen Andrigetto boldy. Ol geçiren 10 duşuşygynda 15 utuk (4+11) toplady.
Finlýandiýanyň ýygyndysy öz taryhynda bäşinji gezek dünýä çempiony boldy. Mundan ozal finler 1995, 2011, 2019 we 2022-nji ýyllarda altyn medal gazanypdy. Şweýsariýa bolsa dünýä çempionatlarynda ýekeje gezek hem ýeňiş gazanmady we şu gezek özüniň altynjy kümüş medalyny aldy (1935, 2013, 2018, 2024, 2025, 2026).
Dünýä çempionatynyň bürünç medalynyň eýesi bolsa Norwegiýanyň milli ýygyndysy boldy. Ozal norwegiýalylaryň dünýä birinjiliklerindäki iň ýokary görkezijisi 1951-nji ýyldaky dördünji orundy. Üçünji orun ugrundaky oýunda Norwegiýa dünýä çempionatynda ýeňiş gazanmak boýunça rekord eýesi bolan (28 gezek) Kanada toparyny goşmaça wagtda 3:2 hasabynda utdy.
Hokkeý boýunça dünýä çempionaty 2026-njy ýylyň 15—31-nji maýy aralygynda Şweýsariýanyň Sýurih we Fribur şäherlerinde geçirildi. Şweýsariýa çempionaty 11-nji gezek (Olimpiýa ýaryşlaryny hasaba alanyňda) kabul etdi. Ýurt soňky gezek dünýä birinjiligini mundan 17 ýyl ozal geçiripdi.
