Italiýanyň Aznom Automotive kompaniýasy Camal Design Studio bilen bilelikde uzynlygy takmynan 8 metre ýetýän L’Epoque atly premium limuzininiň konseptini tanyşdyrdy. Täze taslama iň kaşaň ulaglara alternatiw hökmünde hödürlenilýär.
Limuzini döredijiler 1920-nji ýyllaryň dabaralara şeýle-de döwlet gullugyna niýetlenen — Bugatti we Mercedes-Benz 770 modellerinden ylhamlanyp, olary döwrebap tehnologiýalar bilen gaýtadan işlediler. L’Epoque modeliniň uzyn kapoty, dik radiator gözenegi, ar-deko elementleri we korpusyň äpetligini görkezýän 30 dýuýmlyk tigirleri bar.
Esasy üns limuziniň içerki dizaýnyna berlipdir. Adaty yzky oturgyçlaryň ýerine diwan, eplenýän kürsüler we merkezde mebel moduly ýerleşdirilipdir. Salonyň giňişligi butik-otel stilinde bezelipdir. Sanly ekranlar görer gözden gizlenen. Ulagyň içiniň howasyny, ýagtylygyny, hatda ysyny sazlamak hem emeli aňa esaslanýan sesli kömekçi arkaly amala aşyrylýar.
Tehniki taýdan ulagdyň her tigrinde bir, jemi dört sany elektromotor bolup, olaryň umumy güýji 1000 at güýjünden geçýär. Ýöriş aralygyny artdyrmak üçin generator hökmünde içinden ýanmaly hereketlendiriji ulanylýar. Ulagyň ramaly gurluşy we uýgunlaşdyryjy asma ulgamy onuň birsyhly rahat hereketini üpjün edýär.
Häzirki wagtda L’Epoque heniz üstünde işlenilýän täsin konsept bolmagynda galýar.
