Kia kompaniýasy Günorta Koreýanyň bazarynda meşhur Seltos krossoweriniň ikinji neslini resmi taýdan tanyşdyrdy we satuwa çykardy. Täze model düýpli özgerdilen dizaýny, ulaldylan ölçegleri we ilkinji gezek hödürlenilýän gibrid güýç ulgamy bilen tapawutlanýar.
Ulagyň benzinli görnüşiniň bahasy 24,77 million wondan (takmynan 17 200 dollar), gibrid wersiýasynyň bahasy bolsa 28,98 million wondan (20 100 dollar) başlaýar. Ýakyn wagtda täze model Koreýanyň daşyndaky bazarlaryna hem çykarylar.
Esasy özgermeler:
- Ölçegleri: Ulagyň uzynlygy 4430 mm-e ýetdi, teker binýady bolsa 60 mm uzaldylyp, 2690 mm boldy. Bu bolsa salonyň has giň bolmagyny üpjün edýär.
- Daşky görnüşi: Ägirt uly radiator gözenegi, LED faralar we döwrebap süýşýän gapy tutawaçlary ulagyň esasy dizaýn aýratynlyklarydyr.
- Salony: Içki bölümde 12,3 dýuýmlyk sanly enjamlar paneli we multimedia ekrany birleşdirilen. Şeýle hem, howa gözegçiligi (klimat-kontrol) üçin aýratyn 5 dýuýmlyk displeý ýerleşdirildi. Transmissiýany dolandyryş desgasy bolsa rul sütünine geçirildi.
Ulagyň iki hili güýç ulgamy hödürlenilýär - 1,6 litrlik turbomotor: 193 at güýjüne eýe bolup, 8 basgançakly awtomatiki geçiriji bilen işleýär.
1,6 litrlik gibrid: 141 at güýjüni öndürýär we 6 basgançakly robotlaşdyrylan transmissiýa bilen enjamlaşdyrylan.
Howpsuzlyk babatda ulagyň hatda iň ýönekeý toplumynda hem 9 sany howpsuzlyk ýassygy göz öňünde tutulypdyr.
