2025-nji ýylyň ahyrynda dünýäniň smartfon bazary täze enjamlaryň ortaça bahasy boýunça ilkinji gezek 400 dollar görkezijisinden geçdi. Bu barada Counterpoint Research kompaniýasynyň analitikleri habar berýär.
Satuwyň mukdar taýdan ösüşi bary-ýogy 4% bolan hem bolsa, öndürijileriň umumy girdejisi rekord 135 mlrd dollara ýetdi. Bu ösüş haryt üpjünçiliginiň artmagy bilen däl-de, satylan her bir smartfonyň ortaça bahasynyň gymmatlamagy bilen baglanyşyklydyr.
2025-nji ýylda bazaryň lideri Apple boldy. Kompaniýa dördünji çärýekde dünýä bazarynyň 57%-ine eýeledi. iPhone 16 we iPhone 17 smartfonlaryna, şeýle hem Pro Max wersiýasyna bolan ýokary isleg girdejini 11% artdyryp, 76 mlrd dollara ýetirmäge mümkinçilik berdi.
Samsung bazara iberilen smartfonlaryň sanyny 17% artdyryp, iň ýokary ösüşi görkezdi, emma enjamlaryň ortaça bahasy 20% peseldi. Kompaniýa Roždestwo satuwy döwründe esasy ünsi Galaxy A seriýasyna gönükdirdi. Umumy girdeji bolsa Galaxy S25 flagmanynyň we eplenýän Z Fold7 modeliniň hasabyna 12% ýokarlandy.
Oppo kompaniýasynyň girdejisi Reno 14 we Find smartfonlarynyň netijesinde 23% ýokarlandy. Xiaomi-niň girdejisi we satuwy operatiw hem fleş-ýatlaryň bahasynyň gymmatlamagy sebäpli, takmynan, 10% peseldi, bu ýagdaý arzan modelleriň girdejililigini azaltdy.
Analitikleriň çaklamalaryna görä, 2026-njy ýylda emeli aň funksiýalarynyň goşulmagy we ätiýaçlyk şaýlarynyň ýetmezçiligi sebäpli smartfonlar gymmatlamagyny dowam etdirer.
Smartfonlaryň ortaça bahasy ilkinji gezek 400 dollardan geçdi
- 02.02.2026 16:26
- 2.7k+
