Samsung kompaniýasy Device Care goşundysyny täzeledi we oňa push-bildirişlerindäki spam hem-de mahabatlar bilen awtomatiki göreşmek üçin niýetlenen "Intelligent Blocking" funksiýasyny goşdy.
Bu täzeçillik Device Care-iň 13.8.80.7 wersiýasynda peýda boldy. Täze ulgam dürli programmalardan gelýän bildirişleri seljerýär we olaryň haýsysynyň mahabat häsiýetli ýa-da päsgel beriji bolup biljekdigini özbaşdak anyklaýar.
Eger haýsydyr bir programma push-bildirişleri aşa işjeň ugradyp başlasa, smartfon ony awtomatiki usulda "çuňňur uky" režimine geçirip bilýär. Şondan soňra bolsa şol programma ulanyja bildiriş ugratmak mümkinçiligini düýbünden ýitirýär.
Samsung bu tehnologiýanyň häzirlikçe käbir ýalňyşlyklar bilen işläp biljekdigini we käwagt peýdaly bildirişleri mahabat hökmünde kabul edip biljekdigini belleýär. Şol sebäpli ulanyjylara Device Care sazlamalary arkaly islendik programmanyň bloklanmasyny el bilen aýyrmak mümkinçiligi hem galdyryldy.
"Intelligent Blocking" funksiýasy häzirlikçe diňe One UI 8.5 täzelenmesinde işleýän enjamlarda elýeterlidir. Ony ilkinji bolup Galaxy S26, Galaxy S26+ we Galaxy S26 Ultra modelleriniň ulanyjylary peýdalanyp bilerler.
Häzirki wagtda Samsung-yň we Google-yň resmi dükanlarynda Device Care-iň öňki wersiýasy hödürlenýär. Täze toplumy eýýäm APK faýllary arkaly el bilen gurnap bolýar, emma onuň ähli ulanyjylar üçin global görnüşde doly ýaýradylmagyna ýene birnäçe hepdeden garaşylýar.
