Italiýanyň günortasyndaky gowakda takmynan 12 000 ýyl ozal ýaşan ýetginjek gyzyň galyndylary tapyldy. Live Science neşiriniň habar bermegine görä, onda akromezomeliki displaziýanyň Maroto görnüşiniň alamatlary anyklandy.
New England Journal of Medicine žurnalynda çap edilen barlagyň netijeleri NPR2 geninde seýrek duş gelýän genetiki mutasiýanyň bardygyny tassyklady. Bu, alymlar tarapyndan on müň ýyl mundan ozal aradan çykan ynsanda ýüze çykarylan ýeke-täk mutasiýadyr.
Lýež uniwersitet hassahanasynyň barlagçy-endokrinology, ylmy işiň awtorlarynyň biri Adrian Deýli hem hu hakda aýratyn nygtap: «Bu taryhda DNK arkaly tassyklanan iň irki genetiki diagnozdyr» diýip belledi.
Romito 2 ady berlen gyzyň boýy takmynan 110 sm bolupdyr. Görnüşinden, bu kesel onuň el-aýaklarynyň gaty gysgalmagyna we hereketiniň çäklenmegine sebäp bolupdyr.
Gyz boýy 145 sm bolan garyndaşy Romito 1 bilen bilelikde jaýlanypdyr. Genetiki seljerme bu iki gyzyň hem «Willabruna klasteri» atly awçy-ýygnaýjy topara degişlidigini görkezdi. Zorluk alamatlarynyň ýoklugy we adaty iýmit tertibi jemgyýetiň Romito 2-ni alada bilen gurşandygyny alamatlandyrýar.
Italiýada 12 müň ýyl ozal ýaşan gyzjagazda girdenekligiň seýrek görnüşi ýüze çykaryldy
- şu gün 21:48
- 1.1k+
