Ýagşygeldi Kakaýew adyndaky Halkara nebit we gaz uniwersitetiniň talyplary 2026-njy ýylyň 24-29-njy ýanwary aralygynda Özbegistan Respublikasynyň Buhara şäherinde geçirilen matematika we himiýa boýunça halkara olimpiadalarynda bäş sany baýraga mynasyp boldy.
Intellektual bäsleşiklerde türkmen ýaşlary bir altyn, iki kümüş we iki bürünç medal gazanmagy başardy.
Matematika boýunça geçirilen olimpiadada Sanly tehnologiýalar we kiberhowpsuzlyk fakultetiniň birinji ýyl talyby Kerimguly Bendow iň ýokary netijäni görkezip, altyn medala we I derejeli diploma mynasyp boldy. Şol fakultetiň dördünji ýyl talyby Yslam Haýytmuhammedow bolsa kümüş medal we II derejeli diplom bilen sylaglandy.
Himiýa boýunça bäsleşikleriň çäklerinde Himiýa tehnologiýasy we ekologiýa fakultetiniň dördünji ýyl talyby Azim Bahtyýarow kümüş medal we II derejeli diplom aldy. Bürünç medallara we III derejeli diplomlara bolsa şol fakultetiň talyby Abdyrahim Batyrow hem-de Energetika we inženerçilik desgalary fakultetinden Jemşit Talibžonow mynasyp boldy.
Türkmen talyplary Buharada geçirilen matematika we himiýa boýunça olimpiadalarda bäş medal gazandy
- 02.02.2026 00:48
- 2.7k+
