Deloitte kompaniýasy möwsümdäki girdejileri boýunça futbol klublaryna baha berýän Money League ýyllyk reýtingini hödürledi. 2024/25 möwsüminiň lideri tas 1,2 mlrd ýewro girdeji bilen Madridiň «Realy» boldy.
Dünýäniň öňdebaryjy 20 klubunyň umumy girdejisi ilkinji gezek 12 mlrd ýewrodan geçdi. Bu görkeziji geçen möwsüm (11,2 mlrd ýewro) bilen deňeşdirilende 11% ýokarlandy.
Girdeji getiren ugurlar:
- oýunlar — €2,4 mlrd;
- teleýaýlymlar — €4,7 mlrd;
- täjirçilik — €5,3 mlrd.
Täjirçilik girdejileri ilkinji gezek 5 mlrd ýewrodan geçdi we klublaryň girdejileriniň esasy bölegini düzýär. Bu ösüş hemaýatkärlik şertnamalary, klub atributikasynyň satuwy hem-de stadionlaryň we onuň töweregindäki ýerleriň oýun geçirilmeýän günlerinde ulanylmagy arkaly gazanyldy. Soňky agzalan ugur klublaryň stadion infrastrukturasyny dürli göwnaçyjy formatlar arkaly pul serişdesine öwürmäge gönükdirilen biznes-modelleriniň ep-esli ösendigini görkezýär.
Oýunlardan gelýän girdejiler janköýerler üçin hyzmatlaryň gowulanmagy we goşmaça tölegli orunlaryň netijesinde rekord 2,4 mlrd ýewro ýetdi. Teleýaýlym girdejileri 10% ýokarlandy, esasanam, 11-nji orundan 20-nji orna çenli bolan klublar üçin bu görkeziji girdejiniň ýarysyna golaýyny düzýär. Oýunlaryň sanynyň artmagy we on sany klubuň FIFA-nyň Klublaýyn dünýä çempionatyna gatnaşmagy ýaýlymlardan gelýän girdejileri 17% artdyrdy.
«Barselona» stadionyň wagtlaýyn ýapykdygyna garamazdan, 975 mln ýewro bilen reýtingde ikinji orny eýeledi. Girdejiler şahsy orunlar ýaly goşmaça girdeji çeşmeleriniň hasabyna 27% artdy.
Sanawda üçünji orunda «Bawariýa» (€861 mln), dördünjide — «PSŽ» (€837 mln) ýerleşdi. Ilkinji bäşligi 836 mln ýewro girdeji bilen «Liwerpul» jemleýär. Mersisaýdlylar iňlis klublarynyň arasynda iň düşewüntlisi boldy.
Soňky on ýylyň dowamynda ilkinji onlukdaky klublaryň ortaça girdejisi 60%, 11-nji orundan 20-nji orna çenli bolan klublaryňky bolsa 84% ýokarlandy. Klublar teleýaýlym bazaryndaky durgunlylygyň öwezini dolmak üçin täjirçilik ugurlaryny we halkara derejesindäki işjeňligini yzygiderli ösdürýär.
