Genri Kewill «Dagly» filminiň remeýkinden ilkinji kadrlary paýlaşdy

Aktyor Genri Kewill sosial torlarda «Dagly» («Горец») filminden ilkinji şekilleri paýlaşdy. «Amazon MGM» kinostudiýasynyň bu taslamasy 1980-nji ýyllarda surata düşürilen adybir filmiň remeýkidir.
Filmiň režissýorlyk kürsüsinde «Jon Uik» franşizasynyň awtorlarynyň biri bolan Çad Stahelski oturýar. Surata düşüriş işleriniň başlanmagy, Kewilliň trýuklary ýerine ýetirmäge taýýarlyk görýän wagty alan şikesi sebäpli 2026-njy ýylyň başyna süýşürilipdi. Aktyor filmde ölmez-ýitmez şotland Konnor MakLaudyň keşbini janlandyrar.
Aktyorlar düzümine Deýw Bautista, Karen Gillan, Jimon Hunsu we Marisa Abela ýaly meşhur aktýorlar hem girdi.
Filmiň sýužeti diňe başyny almak arkaly ýok edip bolýan söweşijileriň taryhyna esaslanýar. Asyrlar boýy dowam eden darkaşyň netijesinde ýeňiji bolan tarap dünýäni dolandyrýan syrly güýje eýe bolýar.
Çad Stahelski franşizanyň asyl mifologiýasyny saklap, ssenariýany täzeden işlemegi meýilleşdirýär.
«Biz wakalary 1500-nji ýyllaryň başyndaky daglyk ýerlerden häzirki zaman Nýu-Ýorka we Gonkonga geçireris we mundan näme çykjagyny göreris. Munda ekşn üçin uly mümkinçilikler, köp adama eýgertmejek keşbi döretmäge şert bar. Bu hekaýata, edil siziň pikir edişiňiz ýaly bolmasa-da, birneme söýgi-de gatylan» diýip, režissýor öňräk beren interwýusynda gürrüň beripdi.