ABŞ-da ýene «şatdaun» başlandy: bu gezek hökümetiň işi bölekleýin togtadyldy

31-nji ýanwardan başlap ABŞ-nyň hökümetiniň işi tassyklanan maliýe serişdeleriniň ýokdugy sebäpli bölekleýin togtadyldy. Bu barada The Guardian neşiri habar berýär.
Hökümetiň işiniň wagtlaýyn togtadylmagy Demokratik partiýanyň senatorlary Içerki howpsuzlyk ministrligini maliýeleşdirmek baradaky kanun taslamasyny goldamakdan boýun gaçyranyndan soň bolup geçdi. Muňa immigrant we serhet gulluklarynyň iş usullary sebäp boldy.
Demokratlaryň resminama ses bermekden ýüz öwürmegi sebäpli, Kongresiň aşaky palatasy beýleki döwlet edaralarynyň işini maliýeleşdirmek bilen bagly kanun taslamalarynyň uly bukjasyny wagtynda tassyklap bilmedi. Bu çözgütleri kabul etmegiň möhleti 30-njy ýanwarda, anna güni ýarygije tamamlandy.
Anna güni Kongresiň ýokary palatasy hökümeti maliýeleşdirmek barada kanun taslamasynyň ylalaşykly görnüşini makullady. Ýöne aşaky palata oňa diňe duşenbe güni, 2-nji fewralda seredip biler. Wekiller palatasynda orunlaryň aglabasy respublikanlara degişli bolansoň, resminamanyň kabul edilmegine garaşylýar.
ABŞ-da mundan öňki şatdaun 2025-nji ýylyň 1-nji oktýabrynda bolup geçdi. Şonda hökümet düzümleriniň işiniň togtadylmagy 43 güne çekipdi we ýurduň taryhynda iň dowamly şatdaun boldy.