Apple kompaniýasy dokuz sany ýurtda programmalaryň we programma içindäki satyn alyşlaryň bahalaryny üýtgetmek barada karara geldi. Bu barada kompaniýa işläp düzüjilere iberen ýörite habarnamasynda mälim etdi. Bahalardaky üýtgeşmeler eýýäm güýje girdi we täze aýda ýene-de goşmaça düzedişleriň girizilmegine garaşylýar.
Kompaniýanyň resmi beýanyna görä, bahalaryň we işläp düzüjilere tölenýän tölegleriň gaýtadan gözden geçirilmegine ýerli salgyt kanunçylygyndaky üýtgeşmeler sebäp boldy. Täze baha syýasaty aşakdaky ýurtlara degişli bolar:
- Merkezi Aziýa we GDA: Gazagystan, Russiýa.
- Ýewropa: Finlýandiýa, Litwa.
- Aziýa we Afrika: Türkiýe, Butan, Gana, Mawrikiýa we Zimbabwe.
Apple-iň wekilleriniň bellemegine görä, bu üýtgeşmeler işläp düzüjiler tarapyndan elde kesgitlenen bahalara täsir etmez. Şeýle-de, ulanyjylaryň eýýäm bar bolan we awtomatiki täzelenýän abunalarynyň bahasy üýtgewsiz galar.
