NASA özüniň iň güýçli we energiýa taýdan tygşytly, iň ýokary öndürijiligi 20 petaflopsdan geçýän «Afina» (Athena) superkompýuterini resmi taýdan tanyşdyrdy.
Kaliforniýadaky Eýms adyndaky barlag merkezinde ýerleşdirilen täze hasaplaýyş toplumy indiki nesliň kosmos we awiasiýa maksatnamalaryny durmuşa geçirmekde esasy gural bolar.
Bu ulgam «High-End Computing Capability» (HECC) taslamasynyň flagmanydyr. Agentligiň berýän maglumatyna görä, «Afina» AMD EPYC prosessorlaryna esaslanýan 1024 sany hasaplaýyş ulgamyny özünde jemleýär we 786 terabaýt operatiw ýadyna (RAM) eýedir. Şeýle tehniki aýratynlyklar oňa sekuntda 20 kwadrillion operasiýany ýerine ýetirmäge mümkinçilik berýär.
Superkompýuteriň hasaplaýyş güýji raketa uçuşlaryny modelirlemäge we ýangyç taýdan tygşytly uçarlary taslamaga gönükdirilendir, bu bolsa gymmat bahaly fiziki synaglaryň sanyny azaltmaga kömek eder. Mundan başga-da, «Afina» emeli aňyň uly göwrümli modellerini okatmak üçin platforma hökmünde ulanylýar. Emeli aň ulgamlary ylmy kanunalaýyklyklary ýüze çykarmak, atmosfera hadysalaryny modelirlemek we Gün tupanlarynyň Ýere bolan täsirini ýüze çykarmak üçin hemralardan gelýän petabaýtlarça maglumatlary seljerer.
