Coca-Cola-nyň ak aýysy «dönüklik edip», Pepsi-niň tarapyna geçdi

Onýyllyklaryň dowamynda Coca-Cola markasy bilen baglanyşdyrylan ak aýy garaşylmadyk ýagdaýda tarapyny üýtgetdi we Pepsi-niň täze mahabatynyň baş gahrymanyna öwrüldi.
Pepsi kompaniýasy Superboul-2026 üçin «Saýlaw» (The Choice) atly wideoşekilli mahabatyny çykardy. Sýužetiň merkezinde 1993-nji ýyldan bäri tomaşaçylara bäsdeş markanyň Roždestwo mahabatlaryndan tanyş bolan meşhur ak aýy durýar. Ssenariý boýunça ol «Pepsi Challenge» kampaniýasyna gatnaşýar we garaşylmadyk netije bilen ýüzbe-ýüz bolýar: göz ýumup saýlanynda ol iki bankanyň arasyndan Coca-Cola Zero Sugar-yň deregine, «dönüklik bilen» Pepsi Zero Sugar içgisini saýlaýar.
Bu açyş aýynyň öz durmuşynyň manysyna şübhelenmegine sebäp bolýar — ol psihoterapewte gatnap başlaýar we Pepsi muşdagy hökmündäki täze şahsyýetini kabul etmäge dyrjaşýar. Mahabatyň dowamynda Queen toparynyň «I Want to Break Free» aýdymynyň ýaňlanmagy sýužetiň drama häsiýetini has-da güýçlendirýär.
Wideony «Oskar» baýragynyň eýesi Taýka Waýtiti surata düşürdi. Ol wideoda psihoterapewtiň roluny ýerine ýetirýär.
Pepsi kompaniýasy bu sýužetiň 2025-nji ýyldaky «Pepsi Challenge-iň» hakyky maglumatlaryna esaslanýandygyny nygtaýar: synaglar 34 sany bazarda geçirildi we gatnaşyjylaryň 66%-i, hakykatdan hem, Pepsi Zero Sugar-y saýlady. Pepsi-niň marketing bölüminiň ýolbaşçysy 2025-nji ýylda şekersiz içgiler segmentinde brendiň ösüşiniň 30,8%-e ýetendigini we mahabatdaky aýynyň şeýle saýlawy edýän amerikanlaryň köpçüligini alamatlandyrýandygyny belleýär.
Bu wakanyň ýene bir gyzykly tarapy, mundan ozal Coca-Cola-nyň öz Roždestwo mahabatyny taýýarlamakda emeli aňy ulanandygy üçin tankyt edilmegidir. Onuň üstünde üç sany EA studiýasy işläpdi. Gravity Falls multserialynyň awtory Aleks Hirş şonda: «Gyzykly maglumat: Coca-Cola-nyň reňki gyzyl, sebäbi ol işsiz galan hudožnikleriň ganyndan taýýarlandy» diýip, içýakgyçlyk bilen belläpdi.