ABŞ-nyň Milli film sanawyna 25 sany täze kinofilm goşuldy diýip, Variety neşiri habar berýär.
Bu sanaw her ýyl täzelenip, oňa medeni, taryhy ýa-da estetiki ähmiýeti bolan, azyndan 10 ýyl mundan ozal düşürilen filmler girizilýär. Şeýle kino eserleri Kongresiň kitaphanasynda saklanylmaga degişlidir.
Sanawa doly we gysga metražly çeper, dokumental we animasion filmler, şeýle-de höwesjeň wideolar hem girip bilýär. Täze goşulanlar bilen sanawdaky filmleriň jemi sany 925-e ýetdi.
Kongresiň kitaphanaçysynyň wezipesini ýerine ýetiriji Robert R. Nýulen bu sanawyň medeni mirasy gorap saklamakdaky ähmiýetini şeýle belledi:
«Biz filmleri saklap galmak bilen, geljekki nesiller üçin amerikan medeniýetini saklaýarys. Saýlanyp alnan bu filmler kinematografyň halkymyzyň taryhynyň möhüm pursatlaryny ebedileşdirmekde uly orun eýeleýändigini görkezýär».
Şu ýyl sanawa giren esasy filmleriň arasynda aşakdakylar bar:
- «Filadelfiýa» (Филадельфия, 1993) – režissýor Jonatan Demmi;
- «Truman şüweleňi» (Шоу Трумана, 1998) – režissýor Piter Wir;
- «Sagatlar» (Часы, 2002) – režissýor Stiwen Doldri;
- «Supermaşgala» (Суперсемейка, 2004) – «Pixar» studiýasynyň multfilmi;
- «Başlangyç» (Начало, 2010) – režissýor Kristofer Nolan;
- «“Grand Budapeşt” myhmanhanasy» (Отель „Гранд Будапешт“, 2014) – režissýor Ues Anderson.
