Donald Trampyň administrasiýasynyň ýokary wezipeli wekilleri penşenbe güni Waşingtondaky Kennedi merkezinde geçirilen «Melaniýa» dokumental filminiň premýerasyna gatnaşdy.
Umumy býujeti 75 mln dollar bolan bu film Amazon MGM Studios tarapyndan maliýeleşdirildi. Studiýa bu filmi we onuň bilen baglanyşykly geljekde Amazon Prime Video platformasynda çykjak dokumental serialy görkezmek hukugy üçin 40 mln dollar töledi. Ýene 35 mln dollar bolsa mahabat we distribusiýa işlerine sarp edildi. Maglumatlara görä, filmiň mahabaty Demirgazyk Amerikadan daşary, takmynan, 25 ýurtda alnyp baryldy.
Melaniýa Tramp taslamanyň prodýuserleriniň biri hökmünde çykyş edýär. Film Donald Trampyň 2025-nji ýyldaky wezipe girişmek dabarasynyň öň ýanyndaky 20 güne we maşgalanyň Ak tama dolanyp gelmegine bagyşlanýar.
«Amazon» kompaniýasy we režissýor Brett Ratner bu şertnamanyň syýasy matlaplydygy baradaky çaklamalary ret etdi. Ratner: «Bu pul üçin edilmedi» diýip ýaňzytdy.
Film ABŞ-da we Kanadada, takmynan, 1 700 kinoteatrda görkeziler. Analitikler ilkinji dynç günlerinde filmiň 5 mln dollar ýygnamagyny çaklaýar.
ABŞ-da «Melaniýa» dokumental filmi çykdy: premýera Trampyň administrasiýasynyň wekilleri gatnaşdy
- 31.01.2026 17:10
- 5.1k+
