Magtymguly adyndaky TDU-nyň «Ylmy barlaglar we innowasiýalar» elektron žurnaly dörediler

30-njy ýanwarda geçirilen Hökümet mejlisinde Ministrler Kabinetiniň Başlygynyň orunbasary B.Orazdurdyýewa Türkmenistanyň Prezidentiniň garamagyna Magtymguly adyndaky Türkmen döwlet uniwersitetiniň «Ylmy barlaglar we innowasiýalar» atly täze ylmy-köpçülikleýin elektron žurnalyny döretmek baradaky teklibi hödürledi. Bu barada «Watan» habarlar gepleşiginde habar berildi.
Ýurduň bilim we ylym ulgamlaryndaky öňdebaryjy tejribelerini ýaýmaga gönükdirilen täze elektron neşirde professor-mugallymlaryň, alymlaryň we talyp ýaşlaryň ylmy makalalaryny türkmen, iňlis hem-de rus dillerinde köpçülige ýetirmek göz öňünde tutulýar. Žurnalyň sahypalarynda milli mirasyň, filologiýanyň, hukuk ylymlarynyň we psihologiýanyň döwrebap meseleleri, şeýle hem bilimiň önümçilik bilen özara baglanyşygyny pugtalandyrmak boýunça gazanylan oňyn netijeler öz beýanyny tapar.
Sanly žurnalyň döredilmegi ýaşlary täze ylmy açyşlara we innowasion oýlap tapyşlara höweslendirmekde hem möhüm ähmiýete eýe bolar.
Serdar Berdimuhamedow ýurtda sanly ulgamyň mümkinçiliklerinden peýdalanmak üçin ähli şertleriň döredilýändigini belläp, «Ylmy barlaglar we innowasiýalar» atly elektron žurnalyny döretmek baradaky teklibi goldady we bu ugurda degişli işleri geçirmegi wise-premýere tabşyrdy.