Şanhaýda robotlar üçin bogun öndürýän dünýäde ilkinji zawod açyldy

Şanhaýda adamşekilli robotlar üçin elleriň, aýaklaryň we beýleki «beden agzalarynyň» hereketine jogap berýän bogunlary öndürmäge ýöriteleşdirilen dünýäde ilkinji zawod işe girizildi. Bu barada South China Morning Post neşiri habar berýär. Zawod Hytaýyň Eyou Robot Technology kompaniýasyna degişlidir.
Neşiriň maglumatlaryna görä, desganyň taslama kuwwaty ýylda 100 müň sany bogny öndürmäge niýetlenendir. Geljekde kompaniýanyň ýolbaşçylary önümçilik ukybyny, takmynan, üç esse artdyrmagy meýilleşdirýär. Kärhananyň hünärmenleri bogun birleşmeleriniň ähmiýetini nygtap, onuň bir adamşekilli robotyň özüne düşýän gymmatynyň, takmynan, 50%-ini düzýändigini belleýär.
Önümçilik hatarlarynyň giňeldilmegi gumanoid robotlaryň köpçülikleýin satuwy başlamazdan ozal Eyou Robot Technology kompaniýasynyň bazardaky ornuny berkitmäge gönükdirilendir. Gurama bu pudagyň giň gerimli ösüş tapgyryna çenli esasy bölekleriň öňdebaryjy üpjün edijisi bolmagy maksat edinýär.
Önümçilik binýadynyň ösdürilmegi bilen bir hatarda HHR-de ylmy gözlegler hem dowam edýär. Hytaýly inženerler «Science Advances» žurnalynda adamyň aýak sünkleriniň gurluşyny gaýtalaýan robotlaşdyrylan aýaklaryň nusgasyny tanyşdyrdy. South China Morning Post-yň maglumatlaryna görä, dünýäde ýüzlerçe ylmy-barlag toparlarynyň işjeňlik görkezýän wagtynda Hytaýda adamşekilli robotlaryň eýýäm gönüden-göni zawod konweýerlerinde ulanylyp başlanan ýagdaýlary hasaba alyndy.