Özbegistanyň Aşgabatdaky ilçihanasynda «Özbegistan — 2030» strategiýasynyň tanyşdyrylyşy boldy

28-nji ýanwarda Özbegistan Respublikasynyň Türkmenistandaky ilçihanasynyň binasynda täzelenen «Özbegistan — 2030» strategiýasynyň tanyşdyrylyşy geçirildi. Brifingiň dowamynda diplomatik wekilhananyň ýolbaşçysy Rawşanbek Alimow metbugat wekillerini goňşy döwletiň durnukly ösüşiniň ileri tutulýan ugurlaryny kesgitleýän resminamanyň esasy maksatlary bilen tanyşdyrdy.
Maksatnamalaýyn resminama bäş esasy ugur boýunça ýüz sany maksady öz içine alýar. Olaryň hatarynda durmuş gurşawy, ykdysady ösüş, tebigy baýlyklary gorap saklamak we kanunyň hökmürowanlygyny üpjün etmek ýaly ugurlar bar. Strategiýa raýatlaryň mümkinçiliklerini durmuşa geçirmäge hem-de Özbegistanyň howpsuz we parahatçylyksöýüji döwlet hökmündäki statusyny berkitmäge gönükdirilen daşary syýasy ugruny dowam etdirmäge gönükdirilendir.
Ilçi Alimow sebit hyzmatdaşlygyna we Merkezi Aziýanyň Gündogar bilen Günbataryň, Demirgazyk bilen Günortanyň arasynda baglanyşdyryjy halka hökmündäki ornuna aýratyn ünsi çekdi. Prezident Şawkat Mirziýoýewiň, Prezident Serdar Berdimuhamedowyň we Halk Maslahatynyň Başlygy Gurbanguly Berdimuhamedowyň berk syýasy erki netijesinde iki ýurduň arasyndaky gatnaşyklaryň strategik hyzmatdaşlyk derejesine ýetendigi bellenildi.
Özbegistan Türkmenistan bilen sebit taslamalarynyň çäklerinde, şol sanda üstaşyr ulag geçelgelerini ösdürmek, söwda-ykdysady gatnaşyklar we medeni-ynsanperwer alyş-çalyş boýunça hyzmatdaşlygy giňeltmegi meýilleşdirýär. Häzirki wagtda Strategiýanyň taslamasy jemgyýetçilik maslahatlaşmalary tapgyryndan geçýär.