Russiýada dünýäniň iň güýçli neýtrino obserwatoriýasy gurlar

Russiýanyň Çelýabinsk oblastynyň Snežinsk şäherinde dünýäde iň täze we iň iri neýtrino obserwatoriýasyny gurmak meýilleşdirilýär. Bu barada Milli fizika we matematika merkezi habar berýär.
Taslama hakynda merkeziň ylmy ýolbaşçysy, Russiýanyň Ylymlar akademiýasynyň akademigi Aleksandr Sergeýew yglan etdi.
Guruljak toplum «megascience» derejesindäki gurnama statusyna eýe bolar. Desganyň baş wezipesi «täze fizika» dünýäsinde düýpli ylmy barlaglary geçirmekden we mikrodünýäniň gurluşyny öwrenmekden ybaratdyr. Taslamanyň esasy tehniki maksady bolsa, örän pes energiýaly neýtrinolary hasaba almagyň netijeliligini ýokarlandyrmakdyr.
Bölejikleri hasaba almak meselesini çözmek üçin alymlar özboluşly kuwwatly şöhlelenme çeşmesini ýokary duýgurlykly detektorlar bilen birleşdirmegi göz öňünde tutýarlar. MFMM-niň ylmy ýolbaşçysynyň aýtmagyna görä, dünýä boýunça bu tehnologik çözgütler ýeke-täkligine galýar.
Aleksandr Sergeýew bu hakynda: «Snežinskde guruljak obserwatoriýamyzda biz dünýäniň hiç ýerinde bolmadyk örän kuwwatly neýtrino çeşmesini ulanarys. Şeýle-de täze mümkinçilikleri öwrenmek üçin iň duýgur detektorlary dörederis» diýip gürrüň berdi.