Kosmonawtlar üçin kir ýuwujy maşyn we duş kabinasy döredilýär

2026-njy ýylyň tomsunda Halkara kosmos stansiýasy (HKS) üçin niýetlenen kir ýuwujy maşynyň prototipiniň ýerüsti synaglaryna başlamak meýilleşdirilýär. Bu barada «Himiýa maşyn gurluşygynyň ylmy-gözleg instituty» paýdarlar jemgyýetiniň geljegi uly taslamalar bölüminiň başlygy Ýewgeniý Uýmanowa salgylanyp, TASS habar berýär.
Onuň aýtmagyna görä, tejribe önümçiligi häzirki wagtda enjamyň prototiplerini we aýry-aýry esasy böleklerini taýýarlaýar. Şondan soň kir ýuwujy maşyny iş ýüzünde barlamak we kämilleşdirmek tapgyrlaryna geçmek meýilleşdirilýär.
Işlenip düzülýän kir ýuwujy maşyn adaty bolmadyk gurluşa eýe bolup, ol daşyndan kamerany ýa-da ýumşak haltany ýada salýar. Enjam işleýän wagtynda yzygiderli gysylyp-açylar. Bu hereketiň netijesinde eşikler aýlanar we arassalanar. Maşynyň içki göwrümi, takmynan, bäş litre barabar bolar. Kir ýuwlup bolanyndan soň, wakuumlaşdyrma, ýagny içki howany sordurmak we eşikleri guratmak amaly göz öňünde tutuldy. Guratmagyň dowamlylygy elýeterli bolan elektrik energiýasynyň kuwwatyna bagly bolar.
Şol bir wagtyň özünde, institutda kosmosda ulanmak üçin duş kabinasy-da işlenip taýýarlanýar. Ýer tygşytlamak maksady bilen, göwrümi, takmynan, iki kub metr bolan duşy ýygnalýan görnüşde döretmek meýilleşdirilýär.