2025-nji ýylda howa ulaglaryndan peýdalanan ýolagçylaryň sanynyň takmynan bäş milliard adama ýetendigi çaklanýar. Awiakompaniýalaryň umumy girdejisi bolsa, garaşylyşy ýaly, 1 trillion dollardan geçdi.
Aziýa-Ýuwaş ummany sebiti ösüşiň esasy hereketlendiriji güýji boldy. Bu sebitde ýolagçy gatnawy, esasan Hytaýyň we Hindistanyň hasabyna, bir ýylda 10% artdy. 2026-njy ýylda gatnawlaryň möçberiniň ýene 7% artmagyna garaşylýar.
OAG portalynyň maglumatlaryna esaslanýan bu infografika, 2025-nji ýylda sebitler boýunça iň işjeň içerki howa ýollaryny görkezýär:
- Dünýäde 1-nji orun: Çeju – Seul (Günorta Koreýa) Bu ugurda jemi 14,4 million ýolagçy orunlyk kuwwaty meýilleşdirilip, ol absolýut liderligini saklaýar. Çeju we Kimpho howa menzilleriniň arasynda günde takmynan 200 uçuş amala aşyrylýar. "Koreýa Gawaýlary" diýlip atlandyrylýan Çeju adasy ýurduň iň meşhur syýahatçylyk nokady bolmagynda galýar.
- Ýakyn Gündogar: Jidda – Er-Riýad 9,8 million orunlyk bilen öňde barýar (geçen ýyl bilen deňeşdirilende 13% ösüş).
- Latyn Amerikasy: Bogota – Medelýin 6,2 million orunlyk bilen sebitiň iň işjeň ugrudyr.
- Afrika: Keýptaun – Ýohannesburg 5,5 million orunlyk bilen sanawyň başyny çekýär.
- Demirgazyk Amerika: Wankuwer – Toronto 3,7 million orunlyk bilen iň dykyn ugur boldy.
- Ýewropa: Barselona – Palma de Malýorka 3 million orunlyk bilen iň köp gatnalýan ugur hökmünde bellenildi.
Uçuşlaryň ýokary ýygylygy, iri şäherleriň arasyndaky gysga aralyklar we ykdysady ösüş howa gatnawlarynyň geljekde hem okgunly artmagyna itergi berýär.
