Toyota kompaniýasynyň Amerikadaky bölümi täze modeliniň ilkinji tizer suratyny köpçülige hödürledi. Häzirlikçe gizlin saklanýan täze model baradaky habar "Gözýetimde täze bir zatlar bar" diýen ýazgy bilen paýlaşyldy.
Çaklamalara görä, bu surat täze ykjam pikap modeliniň premýerasyna taýýarlyk bolup biler. Ýene bir çaklama görä bolsa, Toyota täze bir krossoweri görkezmäge taýýarlanýar. Tanyşdyryş dabarasynyň gyşyň ahyryna çenli geçirilmegine garaşylýar.
Geçen ýylyň baharynda Toyota iki sany krossower we bir pikap arkaly öz elektromobil hataryny giňeltjekdigini mälim edipdi. Tizerdäki şekil, esasan hem yzky bölegi, gorizontal LED çyrasy we dikligine ýerleşen yzky aýnasy bilen pikaby ýatladýar. Emma Carscoops neşiri kompaniýadaky çeşmelerine salgylanyp, bu meňzeşligiň bilkastlaýyn döredilendigini, aslynda bolsa täze önümiň krossower boljakdygyny öňe sürýär.
Bellesek, Toyota eýýäm özüniň elektrikli pikabyny görkezipdi — ol täze nesil Hilux modeliniň wersiýalarynyň biri bolupdy.
Mundan başga-da, kompaniýanyň Land Cruiser maşgalasyny, şol sanda iri wnedorožnik ulaglarynyň hasabyna giňeltmek meýilleriniň bardygy ozal habar berlipdi. Şeýle hem, bu täzeligiň häzirki Highlander modeliniň ornuny tutjak täze ulag bolmagy hem aradan aýrylmaýar.
Iň soňky çaklamalaryň birine görä, bu tizer diňe bir konsept-kar (taslama awtoulagy) bolup, köpçülikleýin önümçilige goýberilmezligi hem mümkin.
