Iş berijileriň hem iş gözleýänleriň dykgatyna: Aşgabatda boş iş orunlarynyň ýarmarkasy geçiriler

2026-njy ýylyň 4-nji fewralynda Aşgabat şäherinde boş iş orunlarynyň ýarmarkasy guralar. Çäre Aşgabat şäheriniň Zähmet we ilatyň iş bilen üpjünçiligi müdirligi tarapyndan guralýar.
«Нейтральный Туркменистан» gazetiniň habar bermegine görä, sergi sagat 09:00-dan 12:00-a çenli Türkmenistanyň Senagatçylar we telekeçiler birleşmesiniň binasynda geçiriler.
Ýarmarkanyň guralmagyna Bagtyýarlyk, Berkararlyk, Büzmeýin we Köpetdag etraplarynyň Zähmet we ilatyň iş bilen üpjünçiligi bölümleri, şeýle-de Türkmenistanyň Senagatçylar we telekeçiler partiýasynyň Aşgabat şäher komiteti gatnaşýar.
Sergä gatnaşmaga guramalar, kärhanalar, firmalar we telekeçiler çagyrylýar. Iş berijiler boş iş orunlary baradaky maglumatlary 2026-njy ýylyň 1-nji fewralyna çenli hödürlemeli.
Iş gözleýän raýatlar bu ýarmarkada iş berijileriň teklipleri bilen tanşyp, boş iş orunlary barada zerur maglumatlary alyp bilerler. Gatnaşmak isleýänleriň ýanynda hökmany suratda pasporty we zähmet depderçesi bolmalydyr.