Görjege bir pursat wagtlaýyn rugsat: da Winçiniň freskasy ilkinji gezek köpçülige görkeziler

Milanda italýan suratkeşi Leonardo da Winçiniň (1452-1519) seýrek duş gelýän freskasy ilkinji gezek köpçüligiň synlamagy üçin elýeterli bolar. Artnet News neşiriniň habar bermegine görä, bu eser Sfortsa galasynyň Zale delle Asse otagynyň potologynda çekilen.
Zala 7-nji fewraldan 14-nji marta çenli baryp görmek bolar. Şol döwürde syýahatçylara freskany golaýdan synlamak üçin alty metr belentlikdäki dikme agaçlaryň üstüne çykmaga rugsat berler. 14-nji martdan soň zal ýaňadan ýapylar we dikeldiş işleri ýene 18 aýlap dowam eder.
Leonardo da Winçi bu freska işine 1498-nji ýylda gersog Ludowiko Sfortsanyň buýrugy bilen başlapdyr. Zalyň potology biri-birine çolaşan üzüm agaçlarynyň, 16 sany daragtyň, şeýle-de kökleriň we daşlaryň şekilleri bilen bezelipdir. 1499-njy ýylda Milan gersoglygy fransuz goşunlary tarapyndan eýelenenden soň, Ludowiko Sfortsa şäheri terk edýär, gala bolsa harby maksatlar üçin ulanylyp başlanýar. Şol wagtlarda hem freskanyň üstüne boýag çalyp, gözden ýitirilipdir.
Bu gymmatly eseriň, baryp-ha XIX asyryň ahyrynda üsti açylýar. XX asyryň dowamynda ol tapgyrlaýyn dikeldilýär. Häzirki wagtda restawratorlar diwarlardaky duzlary aýyrmak we freskanyň ýüzüni arassalamak üçin ýapon tüwi kagyzyny hem-de minerallardan arassalanan suwy ulanýarlar.