Aziýanyň ýetginjekler oýunlary 2029-njy ýylda Daşkentde geçiriler

Daşkent şäherinde Aziýa Olimpiýa geňeşiniň (AOG) 46-njy Baş assambleýasy geçirilýär. Çäräniň birinji gününiň esasy çözgüdi Özbegistanyň paýtagty Daşkent şäheriniň 2029-njy ýylyň Aziýanyň ýetginjekler oýunlarynyň paýtagty diýlip resmi taýdan tassyklanmagy boldy. 2031-nji ýylyň oýunlarynyň paýtagty hökmünde Pnompen (Kamboja) saýlandy.
Guramaçy şäherler bilen degişli şertnamalara assambleýanyň mejlisiniň dowamynda gol çekildi.
Bu halkara çärede Türkmenistana ýurduň Milli Olimpiýa komitetiniň baş sekretary Ata Akmämmedowyň ýolbaşçylygyndaky resmi wekiliýet wekilçilik edýär.
Forum Halkara Olimpiýa Komitetiniň prezidenti Tomas Bahyň wideoaragatnaşyk arkaly ýüzlenmesi bilen açyldy. Şeýle hem çäräniň dowamynda «AOG-yň öňünde bitiren hyzmatlary üçin» baýraklarynyň gowşurylyş dabarasy boldy.
Assambleýanyň iň möhüm çözgütleriniň biri Aziýa Olimpiýa geňeşiniň täze prezidentiniň biragyzdan saýlanmagy boldy. Bu wezipäni ýeke-täk dalaşgär bolan Kataryň Olimpiýa komitetiniň başlygy Jawan bin Hamad Al Tani eýeledi.
Iş maksatnamasynyň çäklerinde AOG-yň wise-prezidenti Otabek Umarow Merkezi Aziýada sportuň ösüşi baradaky hasabaty bilen çykyş etdi. Şeýle-de, wekiliýetleriň öňünde Bütindünýä antidoping agentliginiň ýolbaşçysy Witold Banka çykyş edip, antidoping kadalarynyň berjaý edilişine gözegçiligi güýçlendirmek meselelerine ünsi çekdi.
Assambleýa geljekki iri ýaryşlara, şol sanda 2026-njy ýylda Aýti-Nagoýada (Ýaponiýa) we Er-Riýadda (Saud Arabystany) meýilleşdirilen tomusky Oýunlara görülýän taýýarlyk baradaky tehniki hasabatlary gözden geçirmek bilen tamamlanar.