Apple-iň ýolbaşçysy wezipesini tabşyrmaga taýýarlanýar: kompaniýada Jon Týornusyň ygtyýarlyklary giňeldildi

Tim Kuk Apple kompaniýasynyň enjamlaýyn üpjünçiligini işläp düzmek boýunça wise-prezidenti Jon Týornusyň ygtyýarlyklaryny giňeldip, oňa kompaniýanyň dizaýnerler toparyna gözegçilik etmegi tabşyrdy. Bu barada Bloomberg agentliginiň žurnalisti Mark Gurman habar berýär.
Ozal köpçülikleýin habar beriş serişdelerinde Apple-iň ýolbaşçy düzüminde üýtgeşmeleriň bolup biljekdigi we Jon Týornusyň Tim Kukuň ornuna geljek esasy dalaşgärleriň biri hasaplanýandygy barada maglumatlar peýda bolupdy. Bu habarlar resmi taýdan tassyklanmasa-da, täze wezipe top-menejeriň karýera ösüşiniň gytaklaýyn alamaty hökmünde görülýär.
Dizaýn ugry Apple-iň gurluşynda iň esasy bölümleriň biri hasaplanýar. Dürli ýyllarda bu ugra Joni Aýw, soňra Tim Kukuň özi, ondan soň eýýäm pensiýa çykan Jeff Wilýams ýolbaşçylyk etdi.
Mark Gurmanyň pikiriçe, jogapkärçilik çäginiň giňeldilmegi Tim Kukuň Týornusy kompaniýanyň içindäki ähli möhüm amallar bilen tanyşdyrmak islegi bilen baglanyşykly bolup biler. Bu oňa Apple-iň dolandyryş ulgamyndan we bölümleriniň işinden has gowy baş çykarmaga mümkinçilik berer.
2025-nji ýylda Jon Týornus enjamlary işläp düzmegiň uzak möhletleýin meýilnamalaryna we Apple önümleriniň umumy çykyş strategiýasyna hem jogapkär boldy.
Şol bir wagtyň özünde, Bloomberg-iň maglumatlaryna görä, Tim Kuk ABŞ-nyň Prezidenti Donald Trampyň ygtyýarlyk möhleti tamamlanýança baş direktor wezipesinden gitmegi meýilleşdirmeýär. Bu bolsa Týornusa kompaniýanyň işine has içgin aralaşmak üçin goşmaça wagt berýär.