Asyryň iň dowamly Gün tutulmasy 6 minuda çeker: oňa haçan garaşmaly?

2027-nji ýylyň 2-nji awgustynda Günorta Ýewropanyň, Demirgazyk Afrikanyň we Ýakyn Gündogaryň käbir sebitlerinde Günüň doly tutulmasy bolar. Iň ýokary tapgyrda Aý Günüň ýüzüni 6 minut 23 sekuntlap ýapar. Astronomlaryň çaklamalaryna görä, bu iň azyndan 2114-nji ýyla çenli gury ýerde synlap boljak iň dowamly doly Gün tutulma bolar» diýip, Ecoticias neşiri ýazýar.
Doly tutulma fazasy üç kontitentiň üstünden geçer. Ispaniýanyň günortasyndan başlap, Gyzyl deňziň kenarlaryna we Afrikanyň şahyna  (Somaliniň töweregi) çenli bolan gözegçilik zolagynda takmynan 89 million adam ýaşaýar. Tutulma wagtynda asman mese-mälim garalar, ýagty ýyldyzlar we planetalar görner, howanyň temperaturasy peseler, Aýyň gara diskiniň töwereginde bolsa Günüň täji peýda bolar.
Tutulmanyň seýrek duş gelýän dowamlylygy birnäçe şertleriň utgaşmagy bilen düşündirilýär. Aý perigeýe (Ýere iň golaý nokada) golaý bolup, adatdakysyndan has uly görner, Ýer bolsa afeliýden (Günden iň uzak nokatdan) sähel soňra bolar — şol sebäpli Gün hem birneme kiçiräk görner. Şeýle-de, kölegäniň ýoly, onuň has haýal hereket edýän ýeri bolan tropiki giňlikleriň golaýyndan geçer.  
Tutulmanyň iň ýokary fazasyna Müsürdäki Luksoryň töwereginde garaşylýar. Tutulmanyň ýoly Atlantik ummanynyň üstünden başlap, Gibraltar bogazyndan, Ispaniýanyň günortasyndan, Demirgazyk Afrika ýurtlaryndan, Ýakyn Gündogardan geçer we Hindi ummanynyň üstünde tamamlanar.