Hytaý alymlary saçyň tary ýaly inçe we çeýe sapaga millionlarça tranzistory sygdyrdylar

Hytaýda çeýe elektronikanyň geljekdäki köpçülikleýin önümçiligi üçin esas döredildi. Taslamany düzüjiler inçejik çeýe sapak görnüşinde mikroshema taýýarladylar. Geljekde şeýle sapaklardan hasaplamalary ýerine ýetirip, neýroulgamlar bilen işläp we maglumatlary görkezip biljek matalary dokap bolar.
Barlagyň netijeleri Nature žurnalynda çap edildi.
Çeşmeleriň berýän maglumatlaryna görä, sapagyň inçeligi adamyň saçynyň tary bilen deňeşdirerlik derejededir, Çap edilen suratlarda onuň diametri 0,5 mm-e golaý görünýär. Şeýle-de bolsa, bu sapagyň her kwadrat santimetrinde 100 müňe golaý tranzistor bar. Bu bolsa, sapaklary mata görnüşinde birikdirmek ýaly çylşyrymly hasaplama işleri üçin ýeterlikdir.
Işiň gysgaça beýanynda süýümli integral shemasynyň iýmitlendiriş, ölçeg we maglumatlary görkezmek ýaly wezipeleri ýerine ýetirýändigi görkezilýär. Ilki bilen, çipiň tekiz we çeýe esasy taýýarlanylýar, soňra bolsa ol sapak görnüşine geririlýär. Alnan mikroshema 30 göterime çenli süýnmäge ukyplydyr we 10 müň gezek süýndirilip-goýberilmäge durnuklydyr. Şeýle-de ol 180 gradus eplenende-de öz iş ukybyny saklaýar.
Şeýle matanyň bir metri käbir häzirki zaman prosessorlary bilen bäsleşip biljek millionlarça tranzistory özünde saklap biler. Bu tehnologiýa geýilýän elektronikada giňden ulanylyp, ony çyglylyga, aýaza ýa-da yssa garamazdan, iň agyr şertlerde hem ulanmaga durnukly we çydamly edip biler.