NASA "Orion" kosmos gämisiniň ekipažy bilen Aýyň daşyndan aýlanyp gelmeli "Artemis II" dolandyryşly missiýasynyň goýberiş tertibini neşir etdi. Bu maglumat agentligiň X sosial ulgamyndaky resmi hasabynda paýlaşyldy.
Çap edilen maglumatlara görä, uçuşyň amala aşyrylyp bilinjek ilkinji penjiresi 6-njy fewralda, Aşgabat wagty bilen sagat 07:41-de (UTC boýunça 02:41) açylar. Häzirki meýilnamada görkezilen iň soňky sene bolsa 30-njy apreldir. NASA şu ýylyň fewral aýyndan aprel aýynyň ahyryna çenli bolan döwürde jemi 16 sany mümkin bolan uçuş senesini göz öňünde tutýar.
Uçuşa taýýarlyk işleri jemleýji tapgyra geçdi. Missiýanyň ekipažy eýýäm 14 günlük hökmany uçuşdan öňki karantine başlady. Bu, kosmonawtlaryň saglygyny goramak maksady bilen pilotly uçuşlaryň öňünden geçirilýän adaty standart ýagdaýdyr.
Meýilnamanyň berjaý edilmegi üçin esasy tapgyr uçuşyň baş repetisiýasy bolar. SLS göteriji raketasynyň we "Orion" gämisiniň synaglary 2-nji fewralda LC-39B goýberiş meýdançasynda geçiriler. Synag wagtynda ähli esasy ulgamlar mümkin bolan uçuşdan öň barlanar.
Bu repetisiýanyň netijeleri missiýanyň ilkinji bellenen wagtda uçup-uçmajakdygyny ýa-da uçuşyň meýilnamada görkezilen indiki seneleriň birine süýşüriljekdigini kesgitlär.
