Jokowiç «Uly tuwulga» ýaryşlarynda 400 ýeňiş gazanan ilkinji tennisçi boldy

Serbiýaly tennisçi Nowak Jokowiç taryhda «Uly tuwulga» ýaryşlarynyň ýekelikdäki bäsleşiginde 400 ýeňiş gazanan ilkinji türgen boldy. Bu rekord görkezijisi türgeniň Awstraliýanyň açyk çempionatynyň (Australian Open) dördünji tapgyryna çykmagy bilen hasaba alyndy.
Açyk döwürde (professionallaryň we höwesjeňleriň ähli resmi ýaryşlara gatnaşyp başlamagy bilen 1968-nji ýyldan bäri ýöredilýän hasapnama) gazanylan ýeňişleriň sany boýunça ikinji orun 369 gezek ýeňiş gazanan şweýsariýaly Rojer Federere degişlidir.
Häzirki wagtda 38 ýaşyndaky Jokowiç Professional tennisçiler assosiasiýasynyň (ATP) dünýä reýtinginde dördünji orny eýeleýär. Serbiýaly türgen bu guramanyň howandarlygynda geçirilýän ýaryşlarda jemi 101 ýeňiş gazandy. Onuň hasabynda «Uly tuwulga» ýaryşlarynyň 24 tituly bar, bu bolsa erkekleriň ýekelikdäki bäsleşigi üçin rekorddyr. Şeýle hem ol 2024-nji ýylyň Olimpiada oýunlarynyň ýeňijisi, 2008-nji ýylyň Olimpiadasynyň bürünç medalynyň eýesi we 2010-njy ýylyň Dewis kubogynyň eýesidir. Mundan başga-da, Jokowiç 428 hepdeläp dünýäniň birinji raketkasy bolup, bu görkeziji boýunça hem absolýut rekorduň eýesi bolmagynda galýar.
Awstraliýanyň açyk çempionaty möwsümiň ilkinji «Uly tuwulga» ýaryşy bolup, oýunlar «hard» düşelen meýdançada geçirilýär. Ýaryş 1-nji fewralda tamamlanar. Onuň baýrak gaznasy takmynan 75 million dollara barabardyr. Bäsleşigiň häzirki çempiony italiýaly tennisçi Ýannik Sinnerdir.