Öňki basketbolçy Dennis Rodmanyň gyzy dünýäde iň köp gazanýan futbolçy boldy

«Waşington Spirit» klubunyň we ABŞ-nyň milli ýygyndysynyň hüjümçisi Triniti Rodmanyň täze şertnamasy ony dünýäde iň köp gazanýan futbolça öwürdi. Bu barada ESPN habar berýär.
23 ýaşly futbolçy Milli zenan futbol ligasyndan (NWSL) «Waşington» bilen şertnamasyny üç ýyl, 2028-nji ýyla çenli uzaltdy. Çeşmeleriň maglumatlaryna görä, onuň ýyllyk girdejisi bonuslar bilen bilelikde, takmynan, 2 mln dollar bolar. Upper 90 Sports Group-dan onuň agenti Maýk Senkowskiniň aýtmagyna görä, ol liganyň taryhynda iň köp hak alýan oýunçy we dünýäde iň köp gazanýan zenan oýunçy bolar.
Zenan futboly üçin rekord şertnama garamazdan, iň gowy erkek oýunçylaryň gazançlary bilen tapawut uly bolmagynda galýar. Capology-nyň maglumatlaryna görä, «Al-Nasryň» portugaliýaly hüjümçisi Kriştianu Ronalduwyň salgytlardan soňky ýyllyk girdejisi 286 mln dollara barabar.
Triniti - öňki meşhur basketbolçy Dennis Rodmanyň gyzy. Ol futbolçy karýerasyna 2021-nji ýylda, 18 ýaşynda «Waşington Spirit» kluby tarapyndan NWSL draftynda ikinji belgi bilen saýlanandan soň başlady. Şol wagt ol NWSL-iň taryhynda draftyň iň ýaş gatnaşyjysy bolupdy. ABŞ-nyň milli ýygyndysynda ilkinji gezek 2022-nji ýylyň fewralynda çykyş etdi.
Rodman 2022-nji ýylda «Waşington Spirit» bilen ýylda 281 müň dollar zähmet haky bilen 1,1 mln dollarlyk dörtýyllyk şertnama baglaşyp, ABŞ-nyň taryhynda iň köp gazanýan zenan futbolçy boldy.
2023-nji ýylda Rodman ABŞ-nyň Milli zenan futbol ligasynyň rekordyny goýdy: ol 13 gol geçirip we on assist edip, 10+10 görkezijisine ýeten iň ýaş zenan futbolçy boldy.