NASA Jeýms Uebb teleskopy tarapyndan düşürilen Ulitka dumanlygynyň täze suratlaryny çap etdi. Ulitka dumanlygy iň meşhur planetar dumanlyklaryň biridir. Ol Gün ulgamymyzdan takmynan 655 ýagtylyk ýyly uzaklykda, Daluw ýyldyz toplumynda ýerleşýär.
Dumanyň görnüşi «Sauron gözüni» ("Ýüzükleriň hökümdary" filminden) ýatladýar. Günbatar žurnalistleri bolsa bu obýekti «Hudaýyň gözi» diýip atlandyrdylar.
Ady biraz pikiriňi üýtgetjek ýaly etse-de, planetar dumanlyklar planetalardan däl-de, Güne meňzeş ýyldyzlardan emele gelýär. Ýöne adatça, olardan has uly bolýar. Şeýle ýyldyzlar ömrüniň ahyrynda köp mukdarda gaz çykarýarlar we gysga wagtlyk ajaýyp kosmik tomaşa öwrülip, giňäp gidýän gabyk döredýärler.
Täze suratlar gaz gabygynyň içindäki ýagty gaz sütünlerini görkezýär. Dumanlygyň merkezinde kadrdan daşarda ak karlik — ölýän ýyldyzyň galyndysy ýerleşýär. Onuň şöhlelenmesi gazy ýagtylandyrýar we ak karligiň golaýyndaky gyzgyn ionlaşdyrylan gaz, has uzakda sowuk molekulýar wodorod we çylşyrymly molekulalaryň emele gelýän tozanly sebitleri ýaly dürli gurluşlary döredýär. Bu ýerde geljekki planetalar üçin çig mal emele gelýär.
Suratdaky reňkler materialyň temperaturasyny we düzümini görkezýär: gök reňk gyzgyn gazy, sary reňk sowaýan wodorody, gyzyl reňk bolsa sowuk gazy we tozany aňladýar. Bu reňkler ýyldyzyň soňky dem alşynyň nähili ýagdaýda täze dünýäler üçin materiala öwrülýändigini görkezýär.
