«Buzuň we oduň aýdymy» äleminde täze sahypa açyldy: 19-njy ýanwarda «Ýedi patyşalygyň rysary» (A Knight of the Seven Kingdoms) serialynyň ilkinji bölümi ekrana çykdy. Jemi 30 minut dowam edýän birinji bölüm eýýäm tomaşaçylaryň gyzgyn söýgüsini gazanmagy başardy.
Serial Beýik rysar Dunkan we geljekde patyşa boljak onuň ýarag göterijisi Eýegon Targariýen barada gürrüň berýär. Premýeradan sanlyja gün geçmegine garamazdan, IMDb portalynda oňa 10 baldan 8,7 bal berildi.
Tomaşaçylar bu täze taslamanyň «Tagt oýunlary» we «Aždarhanyň öýi» ýaly beýleki seriallardan ep-esli tapawutlanýandygyny belleýärler:
- Aždarhasyz we partlamasyz: "Bu asuda premýera. Aždarhalar ýok, partlamalar ýok. Ýöne Westeros ýene-de "dem alýar". Dialoglar ýene-de ähmiýetli, dymmak bolsa köp zady aňladýar" diýip, tomaşaçylaryň biri ýazýar.
- Has ýakyn we has mähirli: synçylaryň pikirine görä, serial uly söweşlere däl-de, gahrymanlaryň häsiýetlerine we olaryň syýahatyna üns berýär. Ulanyjylar sýužetiň mähirliligi, degişmeleri we şol bir wagtyň özünde dünýäniň zabun hakykatlaryny saklap galyşyny öwýärler.
Serial jemi 6 bölümden ybarat bolar. Ikinji bölümiň 26-njy ýanwarda çykmagyna garaşylýar. Jemi alty hepde dowam etjek bu syýahat 22-nji fewralda final bölümi bilen tamamlanar.
