Xiaomi Auto kompaniýasy önümçilik elektromobilleri üçin täze rekord goýdy. Onuň döwrebaplaşdyrylan SU7 Max sedany 24 sagatda diňe zarýad almak üçin saklanyp, 4 264 km ýol geçdi.
Ozal önümçilik elektromobilleriniň arasynda rekord geçen ýylyň tomsunda bir günde 3 961 km geçen Xpeng P7 liftbegine degişlidi. Şeýle-de, 5 479 km geçip bilýän Mercedes-AMG GT XX konsepti bar, ýöne ol entek önümçilik modeli hökmünde çykarylmaýar.
Rekord goýmak üçin CLTC sikli bounça 835 km çenli ýol ätiýajyny alan SU7 Max ulanyldy. Batareýanyň naprýaženiýasy 871 woltdan 897 wolta çenli artdyryldy, bu hem zarýad berşi çaltlaşdyrmaga mümkinçilik berdi: 15 minutda akkumulýator öňki 510 km deregine 670 km ýoly doldurýar. Iki hereketlendirijili enjamyň kuwwaty 673 at güýjünden 690 at güýjüne çenli ýokarlandy.
Täzelenen SU7 üçin sargytlar 7-nji ýanwarda açyldy. Bahalar 229 900 ýuandan 309 900 ýuana (takmynan, 33 müň dollardan 44,5 müň dollara çenli) barabar. Üpjünçilik aprel aýynda başlar. Köne wersiýa üçin sargyt beren müşderilere täze wersiýa bilen çalyşmak mümkinçiligi-de hödürlenýär.
