«Sandfall Interactive» fransuz studiýasy tarapyndan döredilen fentezi görnüşli Clair Obscur: Expedition 33 oýny, baýraklarynyň sany boýunça meşhur «Elden Ring» oýnuny yzda galdyryp, taryhda iň köp baýrak alan taslama öwrüldi.
«ResetEra» forumynyň seljermelerine görä, bu oýun bir ýylyň dowamynda jemi 436 sany «Ýylyň oýny» (Game of the Year) baýragyna mynasyp boldy. Mundan ozalky rekord 435 baýrak bilen «FromSoftware» kompaniýasynyň «Elden Ring» taslamasyna degişlidi.
311 baýrak — ýöriteleşdirilen neşirlerden we hünärmenlerden, 125 baýrak bolsa ulanyjylaryň ses bermeginiň netijesinde gazanyldy.
2025-nji ýylyň baýrak möwsüminde «Expedition 33» ähli yglan edilen «Ýylyň oýny» titullarynyň 70,5%-ini gazanmagy başardy. Oýun eýýäm The Game Awards 2025 we Golden Joystick Awards 2025 ýaly abraýly ýaryşlarda ýeňiji boldy. Indi bolsa ol DICE Awards 2026, GDC Awards 2026 we BAFTA Games Awards baýraklaryna dalaşgärlik edýär. Eger bu baýraklary hem alsa, ol «Baldur’s Gate 3» oýnunyň bäş sany esasy pudak baýragyny almak boýunça rekordyna deňleşer.
2025-nji ýylyň 24-nji aprelinde PC, PlayStation 5 we Xbox Series X|S üçin çykarylan oýun gysga wagtyň dowamynda 5 milliondan gowrak nusgada satyldy. Taslamanyň şowly çykmagy hatda Fransiýanyň prezidenti Emmanuel Makronyň hem ünsüni çekdi we ol oýun barada öwgüli sözleri aýtdy.
