20-23-nji ýanwar aralygynda Aşgabatda Birleşen Milletler Guramasynyň Merkezi Aziýa ýurtlarynyň ykdysadyýetleri üçin Ýörite maksatnamasynyň (SPECA) hepdeligi geçirilýär. Bu çäreler Türkmenistanyň 2025-nji ýylda maksatnama başlyklyk etmeginiň çäklerinde guralýar diýip, «Neýtralnyý Türkmenistan» gazeti belleýär.
SPECA hepdeligi ýokary derejeli halkara duşuşyklary, şol sanda ykdysady forumy we SPECA-nyň Ýolbaşçy geňeşiniň 20-nji sessiýasyny özünde jemleýär.
SPECA 1998-nji ýylda Merkezi Aziýa ýurtlarynyň ykdysady hyzmatdaşlygyny ösdürmek we olary dünýä ykdysadyýetine utgaşdyrmak maksady bilen döredildi. Oňa Azerbaýjan, Owganystan, Gazagystan, Gyrgyzystan, Täjigistan, Türkmenistan we Özbegistan gatnaşýar. Işleri utgaşdyrmagy BMG-niň Ýewropa ykdysady komissiýasy hem-de Aziýa-Ýuwaş ummany sebiti üçin ykdysady we durmuş komissiýasy amala aşyrýar.
Türkmenistan başlyklyk edýän döwründe sebit hyzmatdaşlygyny ösdürmegi we aşakdaky ugurlary esasy wezipeler hökmünde kesgitledi:
- Bilelikdäki taslamalary durmuşa geçirmek;
- Söwda we ulag gatnaşyklaryny berkitmek;
- Energetika hyzmatdaşlygy we sanlylaşdyrmak;
- Ekologiýa meseleleri we dikeldilýän energiýa çeşmelerini ulanmak;
- Ulag geçelgelerini ösdürmek we energetika howpsuzlygyny üpjün etmek.
Hepdeligiň dowamynda ykdysadyýet, energetika, suw serişdelerini dolandyrmak, daşky gurşawy goramak hem-de sebitiň ulag we sanly ulgamdaky arabaglanyşygynyň netijeliligini ýokarlandyrmak meselelerini ara alyp maslahatlaşmak meýilleşdirilýär.
Türkmenistan SPECA-da 2010–2011-nji ýyllarda üstünlikli başlyklyk etdi we 2012-nji ýylda bu wezipä gaýtadan saýlandy. Şeýle hem, gezekli-gezegine başlyklyk etmek düzgünine laýyklykda, ýurdumyz 2019-njy ýylda hem bu wezipäni ýerine ýetirdi.
