Build The Earth taslamasyndan höwesjeňler eýýäm bäş ýyl bäri Minecraft oýnunda 1:1 ölçegde Nýu-Ýorkuň nusgasyny döretmek bilen meşgullanýar. Häzire çenli edilen işler barada wideoda taslamanyň ýolbaşçysy, YouTube blogeri MineFact gürrüň berdi.
Taslamanyň üstünde 50-80 oýunçydan ybarat topar işleýär. Wirtual dünýäde şäher, takmynan, 700 inedördül kilometr meýdany eýelemeli. Häzirki wagtda Aşaky Manhetteniň köp bölegi gurlup tamamlandy. Käbir sebitlerde işler doly ýerine ýetirildi, olaryň arasynda Erkinlik adasy, Noho, Soho, Nolita, Boueri, Kiçi Italiýa, Çaýnataun, Tu-Brijes we Kanal-stritden günortadaky beýleki sebitler bar. Şäheriň bu böleginde ýeke-täk tamamlanmadyk ýer Faýnenşl-distrikt bolup galýar.
Umuman, Minecraft-da eýýäm 50 müňden gowrak bina guruldy. Taslamany döredijiler şäheriň hatda kiçijik elementlerini-de bolşy ýaly görkezmäge çalyşýar.
«Geçen ýyllaryň dowamynda biz ownujak zatlaryň hem nähili möhümdigine düşündik. Mysal üçin, Nýu-Ýorkdan tötänleýin bir oglan oýna girýär we balkondaky gülli küýzesiniň hakyky durmuşdaky ýerinde durandygyny görýär – ana, şonda siz ähli zadyň ýokary derejelidigine düşünýärsiňiz. Olaryň reaksiýalary hemişe gymmatly» – diýip, taslamanyň awtory belledi.
Häzirlikçe şäheriň sanly nusgasyny tamamlamak üçin näçe wagtyň gerekdigi belli däl.
