BGR portalynyň bilermenleri artykmaçlyklary bilen däl-de, howpludygy, tehniki ýalňyşlyklar ýa-da şowsuz konsepsiýalar sebäpli uzak wagtlap ýatda galan smartfonlaryň sanawyny düzdi.
Iň ýaramaz smartfonlaryň sanawyna 13 model girdi. Olaryň arasynda Samsung Galaxy Note 7 (2016) we BlackBerry Storm (2008) hem bar. Birinji smartfonyň batareýasy duýdansyz partlaýardy we ýanýardy, bu hem onuň öndüriji tarapyndan yzyna ýygnalmagyna getirdi. Bu smartfonlary hatda uçaryň bortuna-da almak gadagan edildi.
BlackBerry Storm, öz gezeginde, kompaniýanyň ilkinji sensor smartfony boldy, ýöne ol haýal işleýärdi we Wi-Fi ýokdy.
Antireýtingdäki ýene bir smartfon Nokia Lumia 900 (2012) alyjylary çäkli programmalar toplumy we OS goldawynyň tiz wagtdan bes edilmegi bilen lapykeç etdi.
Iň ýaramaz smartfonlaryň sanawynda şular hem bar:
- Samsung Galaxy Fold (2019) şarnir gurluşynyň gowşaklygy sebäpli döwülýärdi;
- Amazon Fire Phone (2014) şowsuz funksiýalar we programmalaryň ujypsyz toplumy bilen çykdy;
- 3D ekranly HTC Evo 3D (2011) derrew gözüňi ýadadýardy we agyr işleýärdi;
- Işlemeýän gologrammaly we ýokary bahaly RED Hydrogen One (2018);
- Meseleli goşa ekrany bolan Kyocera Echo (2011);
- Web3 tehnologiýasyny wada beren, ýöne tamany ödemedik Solana Saga (2023);
- Doly derejeli smartfon hökmünde ulanyp bolmadyk kiçijik Palm Phone (2018);
- Korpusy jübüde aňsatlyk bilen egrelýän iPhone 6 (2014);
- Bahasyny ödemedik iPhone 16e (2025);
- Ulanyjylaryň köpüsi üçin gerekmez bolan Facebook Home interfeýsli HTC First (2013).
