YouTube ene-ata gözegçiligi üçin täze funksiýalary girizýär. Bu ýetginjekleriň Shorts wideolaryny görmek üçin sarp edýän wagtyny çäklendirmäge mümkinçilik berer. Ýakyn wagtda ene-atalar we hossarlar şeýle wideolara tomaşa etmegiň wagtyny öz dolandyrýan akkauntlarynda nola çenli azaldyp biler.
Şeýle-de, platforma ýetginjeklere öz ýaşlaryna laýyk gelýän wideolary teklip edip başlar.
«Bu pudakda ene-atalara öz çagalarynyň tomaşa edýän gysga metražly kontentleriniň möçberini doly derejede gözegçilikde saklamaga mümkinçilik berýän ilkinji funksiýadyr» – diýip, YouTube-yň önümleri dolandyrmak boýunça wise-prezidenti Jennifer Flanneri O’Konnor öz blogunda ýazdy.
13 ýaşdan 17 ýaşa çenli ulanyjylar üçin arakesme etmelidigi we ýatmagyň wagty bolandygy barada ýatlatmalar awtomatik usulda işjeňleşdiriler. Mundan başga-da, hyzmat ýetginjeklere bilim we öwrediji wideolary has köp hödürlär.
Kompaniýa täze funksiýalaryň Ýaşlar konsultatiw komitetiniň, Los-Anjelesdäki Kaliforniýa uniwersitetiniň, Amerikan psihologiýa assosiasiýasynyň, Bostonyň çagalar hassahanasynyň sanly abadançylyk barlaghanasynyň we beýleki guramalaryň gatnaşmagynda işlenip düzülendigini habar berýär.
Ýakyn hepdelerde çagalar akkauntlaryny hasaba almagyň täzelenen prosesi elýeterli bolar. Ulanyjylar ykjam goşundyda akkauntlaryň arasynda çalt geçip biler. O’Konnoryň aýtmagyna görä, bu «maşgalanyň her bir agzasyna kontent sazlamalary we olaryň, hakykatdan hem, görmek isleýän, ýaşa laýyk gelýän kontent teklipleri bilen dogry tomaşa tejribesini gazanmaga» kömek eder.
