Netflix striming platformasy Sony Pictures bilen täze şertnama baglaşdy. Oňa laýyklykda, studiýanyň filmleri kinoteatr we içerki prokat tamamlanandan tiz wagtdan soň striming hyzmatynda peýda bolar.
Bu Pay-1 formatly ygtyýarnama şertnamasydyr. Ol prokatdan soň Sony Pictures-iň filmleriniň geljek 18 aýyň içinde ilki we diňe Netflix-de elýeterli bolmagyny göz öňünde tutýar. Şertnama bäş ýyl – 2027-nji ýyldan 2032-nji ýyl aralygynda hereket edýär.
Netflix-iň metbugat gullugy şertnamanyň şu ýylyň ahyrynda durmuşa geçirilip başlanjakdygyny habar berdi. Şertnamanyň çäklerinde platformanyň global gurşawyny 2029-njy ýyla çenli üpjün etmek meýilleşdirilýär.
Bloomberg çeşmeleriniň maglumatlaryna görä, ylalaşygyň bahasy, takmynan, 7 mlrd dollar diýlip hasaplanýar.
Sony bilen Netflix-iň hyzmatdaşlygy eýýäm birnäçe ýyl bäri dowam edýär. 2021-nji ýylda striming hyzmaty ABŞ-da, Germaniýada we Günorta-Gündogar Aziýanyň ýurtlarynda Sony Pictures-iň filmlerini görkezmek hukugyny aldy. Täze şertnama giňelmegini dowam etdirip, bu hyzmatdaşlygy güýçlendirýär.
Sony Pictures-iň film ýygyndylarynda, beýlekilerden başga-da, «Möý adam», «Jumanji», «Jeýms Bond», «Erbetligiň mekany», «Gara geýimli adamlar», «Transilwaniýa oteli», «Arwah awçylary» we «Garagol oglanlar» ýaly kinofranşizalar bar.
