Netflix «Kalmar oýnuny» («Игра в кальмара») dörediji Hwan Don-hýokdan täze serialy sargyt etdi. Deadline-niň habar bermegine görä, taslama «Diler» («Дилер») diýlip atlandyrylýar.
Serialy Hwan Don-hýoga degişli Firstman Studio tarapyndan surata düşüriler. Döredijiniň serialyň soňky işlerine nähili ýagdaýda gatnaşjagy heniz anyklanylmady. Täze serial «Kontrbanditkalar» («Контрабандистки»), «Weteran» («Ветеран»), «Gülleriň urşy» («Война цветов»), «Talaňçylar» («Воры») filmleriniň goýujy-operatory Çhwe Çžon-Hwanyň ilkinji režissýorlyk işi bolar.
Geljekki serialyň sýužetiniň esasy merkezinde Gon Hwa atly kazinolar boýunça tejribeli diler gyz hereket eder. Gyzyň özüni gurşap alan galagoply durmuşdan daşlaşyp, toý etmek, rahatlykda, gorky-ürküsiz ýaşamak hakdaky arzuwlary duýdansyz ýerden jaý meselesindäki galplyklar zerarly paşman galýar. Netijede gyz humar oýunlary oýnamakdaky ussatlygyny ulanyp, gaýtadan jenaýatkärleriň dünýäsine aralaşmaga mejbur bolýar.
Täze serialda baş keşbi Günorta Koreýanyň önümi bolan «Ruhlaryň alhimiýasy» («Алхимия душ») serialyndaky keşbi bilen tanalýan aktrisa Çon So-min janlandyrar. Häzirki wagtda serialyň surata düşüriliş işleriniň başlanýan senesi ýa-da çykarylýan senesi barada takyk maglumat ýok.
2025-nji ýylda tamamlanan «Kalmar oýny» serialy Netflix-iň taryhynda iň meşhur taslamalaryň biri boldy. Häzirki wagtda bu serialyň amerikan spin-off görnüşiniň üstünde işlenilýär.
