Täze Henley Passport Index reýtingi haýsy pasportlaryň syýahatlarda has köp erkinlige ýol açýandygyny görkezdi. Sanawda öňdebaryjy Singapuryň pasporty boldy: onuň raýatlary wizasyz 192 ýurda we sebite baryp bilýär. Ikinji orny 188 ýurda elýeterlilik bilen Ýaponiýa we Günorta Koreýa paýlaşýar.
Ýewropanyň bäş ýurdy – Daniýa, Lýuksemburg, Ispaniýa, Şwesiýa we Şweýsariýa 186 ugur görkezijisi bilen üçünji orny deň derejede paýlaşdy.
Birleşen Arap Emirlikleri (184) häzire çenli iň ýokary ösüşi görkezdi. Ýurt Henley Passport Index-iň 20 ýyllyk taryhynyň dowamynda 149 wizasyz ugry goşup, reýtingde 57 orun ýokary galdy. Hasabatda munuň «durnukly diplomatik işjeňlik we wiza düzgünleriniň ýeňilleşdirilmegi» bilen baglanyşyklydygy bellenilýär.
Bir ýylyň dowamynda iň uly pese gaçyşy Beýik Britaniýa görkezdi. Indi britaniýalylar wizasyz 182 ýurda baryp bilýär, bu bolsa geçen ýylkydan 8 ýurt azdyr.
ABŞ 2025-nji ýylyň ahyrynda ilkinji gezek onlukdan çykandan soň, ýene-de 179 ýurt bilen öňdebaryjylaryň onlugyna gaýdyp geldi.
Reýtingiň ahyrynda Owganystan (24), Siriýa (26) we Yrak (29) ýerleşýär. Iň güýçli bilen iň gowşak pasportlaryň arasyndaky tapawut 168 ugra deň.
2026-njy ýylda dünýäniň iň güýçli pasportlary:
- Singapur – 192
- Ýaponiýa, Günorta Koreýa – 188
- Daniýa, Lýuksemburg, Ispaniýa, Şwesiýa, Şweýsariýa – 186
- Awstriýa, Belgiýa, Finlýandiýa, Fransiýa, Germaniýa, Gresiýa, Irlandiýa, Italiýa, Niderlandlar, Norwegiýa – 185
- Wengriýa, Portugaliýa, Slowakiýa, Sloweniýa, Birleşen Arap Emirlikleri – 184
- Horwatiýa, Çehiýa, Estoniýa, Malta, Täze Zelandiýa, Polşa – 183
- Awstraliýa, Latwiýa, Lihtenşteýn, Beýik Britaniýa – 182
- Kanada, Islandiýa, Litwa – 181
- Malaýziýa – 180
- Birleşen Ştatlar – 179.
Reýting Londonyň raýatlyk meselelerine ýöriteleşýän Henley & Partners konsalting kompaniýasy tarapyndan International Air Association-yň eksklýuziw maglumatlarynyň esasynda düzülýär.
