2025-nji ýyl XIX asyryň ortalarynda yzygiderli gözegçilik başlany bäri iň yssy ýyllaryň sanawynda üçünji boldy. Bu barada ÝB-niň «Copernicus» klimat agentliginiň we Bütindünýä meteorologiýa guramasynyň maglumatlaryna salgylanyp, The Guardian habar berýär.
Iň yssy ýyl 2024-nji ýyl bolmagynda galýar, onuň yzyndan 2023-nji we 2025-nji ýyllar gelýär.
Geçen ýyl ortaça ýyllyk temperatura industrialdan öňki derejeden 1,44 gradus ýokary boldy. Alymlar howanyň ýylamagynyň häzirki depgininde Pariž şertnamasynyň 1,5 gradus çäginden eýýäm 2020-nji ýyllaryň ahyryna çenli geçilip bilinjekdigini duýdurýar – bu bolsa 2015-nji ýyldaky ilkinji çaklamalardan on ýyldan gowrak wagt irdir.
«Hakykatda, 1,5 gradus çägi saklamak maksady başa barmady. Howply klimat kollapsy eýýäm başlady, ýöne dünýäniň muňa taýýardygynyň ýa-da çynlakaý üns berýändiginiň alamatlary az» – diýip, Uniwersitet kollejiniň professory Bill Makguaýr belledi.
2025-nji ýylyň ýanwary gözegçiligiň taryhynda iň yssysy, mart, aprel we maý bolsa ýylylygy boýunça ikinji aýlar boldy. 2025-nji ýylyň fewraldan we dekabrdan başga her aýy diýen ýaly 2023-nji ýyldan öňki islendik degişli aýdan ýyly boldy.
