Bloger we ylmy düşündiriji Zak Armstrong Coca-Cola içgisini mümkin boldugyndan takyk gaýtalap bilendigini aýtdy. Ol tejribäni jikme-jik görkezýän wideony özüniň LabCoatz YouTube kanalynda ýerleşdirdi.
Bir hepdeden az wagtyň içinde wideo 5,3 mln tomaşa we 21 müňden gowrak teswir ýygnady.
Armstrong içgini analiz etmek üçin barlaghana enjamlaryny, şol sanda mass-spektrometrleri ulandy. Olaryň kömegi bilen Coca-Cola aýry-aýry himiki birleşmelere dargadyldy. Alnan maglumatlaryň esasynda bloger tejribä başlap, birnäçe aýyň dowamynda resepti hakyky içgä ýakyn etmek üçin düzümiň üstünde işledi.
Onuň maglumatlaryna görä, içginiň 99%-i adaty goşundylardan – şekerden, fosfor turşusyndan we kofeinden ybarat. Onuň tagamynda esasy roly efir ýaglarynyň garyndysy oýnaýar. Seljerme sitrus miwelerinden alfa-terpineniň, dalçyndan sinnamaldegidiň, şeýle-de muskat hozy we koriandr üçin mahsus birleşmeleriň bardygyny görkezdi.
Möhüm tapgyr guraklyga we agzyňy gamaşdyrýan tagama jogap berýän çakyr taninleriniň we arassalanan koka ýapraklarynyň ekstraktynyň ýüze çykarylmagy boldy. Bloger bu komponenti çaý agajynyň ýagy bilen çalyşdy.
Armstrong alnan şiräniň himiki taýdan hakyky içgä meňzeşdigini nygtaýar. Ol netijede alnan içgini Lab-Cola diýip atlandyrdy. Reseptiň üstünde işlemek tas bir ýyl wagt aldy. Görmezden dadyp görmäge gatnaşan adamlar tejribe görnüşini dükandakydan tapawutlandyryp bilmedi. Käbirleri hatda blogeriň döreden görnüşini has halady.
