Kia kompaniýasy resmi taýdan K4 Sportswagon uniwersalyny tanyşdyrdy. Bu model eýýäm sedan we hetçbek görnüşleri bolan K4 maşgalasyna goşular hem-de şu ýyl Ýewropa bazaryna çykar.
Täze uniwersal Volkswagen Golf we Skoda Octavia ýaly bäsdeşler bilen bäsleşmek üçin niýetlenendir.
K4 Sportswagon modeliň beýleki wersiýalary bilen birmeňzeş platformada guruldy. Teker bazasynyň uzynlygy 2 720 mm-e deňdir. Uniwersal sedandan 15 mm gysga, ýöne hetçbekden 265 mm uzyn. Awtoulagyň dizaýny Kia-nyň özboluşly "Opposites United" stilinde ýerine ýetirilen: dar LED optikasy, görnükli yzky sütüni we yzky gapylarynyň gizlin tutawaçlary bar. GT-Line wersiýasy gara reňkli daşky bezegleri we tapawutly bamperleri bilen saýlanýar.
Yzky oturgyçlar galdyrylyp goýlanda, ýük bölüminiň (bagajyň) göwrümi 604 litre deňdir. Deňeşdirmek üçin, Volkswagen Golf-uň ýük bölümi 611 litr, Škoda Octavia Combi-niňki bolsa 640 litr göwrüme eýedir. Ozalky Kia Ceed Sportswagon modeliniň ýük bölümi 625 litrdi.
Awtoulagyň salony K4 sedanynyň we hetçbekiniň interýerini doly gaýtalaýar. Dolandyryş paneli goşa ekrandan ybarat bolup, smartfonlary simsiz birikdirmek, sanly açar (digital key) we içerki striming hyzmatlary ýaly funksiýalar bilen üpjün edildi.
Model benzinli hereketlendirijiler we "ýeňil" gibrid (mild hybrid) ulgamlary bilen hödürlener:
- Esasy wersiýa: 1,0 litrlik T-GDI turbomotor (114 at güýji) we mehaniki ötürgiçler gutusy.
- Güýçli wersiýalar: 1,6 litrlik hereketlendiriji (148 ýa-da 178 at güýji) we robotlaşdyrylan ötürgiçler gutusy.
- Doly gibrid (HEV): Bu wersiýa biraz soňrak elýeterli bolar.
Awtoulagyň bahalary häzirlikçe mälim edilmedi.
